Ed'pis pu ed' treinte-chonq ans qu'à n'in fouait vir ed' tout chés façons ach' pauv' Logomme, sin bieu-fiu, v'lo Céduline partie dins l'eute monne.
    Al' vérité vraie, y n'o r' rien fouait por l' l'ert'nir. Qué débarros, sangneur ! Pus ed' treinte ans inbellemardé, ché-t-in bail !
    Diminche à veûpes, quand ech' cérusien y l'étouait v'nu vir l'malade, Logomme y l'avouait r'juint dins l'rue.
    - Quoué qui n' n'est ?
    - C'est la fin, mon brave Logomme ; c'est pour aujourd'hui, c'est pour demain.
    - Surtoute, o n'disez point cho por m'fouaire plaisir ?
    - Certes non, elle s'éteint d'heure en heure.
    - Ej' vos croés ; mais, o savez, si a s'éteint, comme o disiez, y n' feut point compter sur mi por li r'monter sin viux Carcel !
    Ech' cérusien, qui l'est au courant d'el' situation y l'est r'monté dins s' vouéture in s' déclatchquant à rire.
    In rintrant dins l' moason, par respect l' baptême, por s' feume qu'al' valouait miux qué s' fille, et pis chés éfants, y s'ertnouait ed' canter l'Aternationalle, pisqué ché l' canchon al' mode.
    Céduline passée, por n'point dire ed' bêtises, y l'étouait sorti pa ech' village, fouaire in p'tiot tour dins chés débits et pis vir ech' bédeu, ech' greffiier ed' mairie et pis ech' fossoyeur, surtoute ech' ti-lo, por li r'comminder d'el' profondeur, por n' point t'ête immardé ed'vant l' Résurection.
     Y pleuvouait à dague et pis y f'souait in vent à écorner chés vaques.
    In s' défilant por picher eine goutte ach' mur de l' vieille église qu'a n'est point intert'nue ed' pis l' tchguerre, v'lo eine ed'mie brique qu'a li passe à deux pouces ed' sin nez !
    Du même coeup, y s'étouait arrêté, comme si qui l' avouait été bersillé pa ech' tonnerre. R'treuvant s' n'esprit au bout d'in bouin momeint :
    - A n' désarmero donc jamouais, ech' sacré viux chameau-lo !... A n'est point putôt r'montée là-haut, qu'à n'in preufite por m' ej'ter des cailleux ! ! !

Tiré du livre "Contes ed'Fleurimond long-minton' de Charles Dessaint Collection Souvenance Editions La Vague verte
avec l'aimable autorisation de la Librairie Papeterie Dessaint - Doullens.

 Conte ed' Fleurimond n°2

  Sommaire des contes